Dat Ünnernehmen Tiemann

Een Erfolgsgeschicht in Beriek Landtechnik

Carl Werner Tiemann
* 1.2.1894, † 4.4.1972

De besten Tieden stünnen wiss nich bevör, as Carl Werner Tiemann an 1.2.1926 den Grundsteen för sein Ünnernehmen leggen dä, sien wichtigste Swoorpunkt wöör de Hannel mit Landmaschinen un Nutzfohrtüüch.

Bulldog mit Luftbereifung
un Lindner Anhänger

Bedüden för em wöör woll de Möglichkeit, de Vertreden von de domals gröötste Landmaschinenfabrik, Heinrich Lanz AG, för den Trecker- un Döschmaschinenberiek in `ne Gegend twüschen Ems un Elv to erhollen un de von sien Vadder 1905 grünnte Hannelsfirma to düssen Zweck to övernehmen. He harr al eenige Erfohrung in den Beroopstwieg un al fröher as annere de Mööglichkeit sehn, de för em in´ne Motorisierung in de Landwirtschaft un in`t Transportwesen legen.

Tiemann hett de
Lanz Bulldogs in de
ünnerschedlichsten Utführungen levert

De eersten Johren wöörn nich eenfach. Torüchslääg bleven nich ut. Over mit soveel koopnännisch Geschick un Utduur hett he dat verstahn, in`ne Krisenjohren 1931/32 alle Klippen to ümschippern, mit jüst soveel Swung un Teelstrevigkeit dreev he ünner Wohrung sekern koopmännischen Dinkens de Firma bit 1939 vöran.

Neven de Vertreden för de Lanz AG, de 1956 in John Deere opgüng, leet sik as tweetet Been dat Nutzfohrtüüchgeschäft von Anfang an goot an. Wöörn dat vöreerst de Stratentogmaschinen mit Hängers, so woor al 1928 de eerste MAN - Lastkraftwagen verköfft un 1934 de Vertreden för düt Fabrikat mit dat Wark afmakt, de bit hüüt mit vullen Erfolg wieder bedreven ward.

De Bedrief an`ne Verdener Straat meern de 50er Johrn
De Ünnerstand rechts in Bild süt noch genau so ut
as to Anfang.

De Övernahm von de Landmaschinengroothannelsfirma Hermann Brüning, Generalvertreden för Lanz-Erntemaschinen un annere naamhafte Maakers, sowie de Koop von een groot Grundstück mit Warksteeden in Johr 1936 wöörn wiedere Mielensteen op`n Weg to`n Erfolg. De neegste Schritt wöör de Errichtung von de eerste Nedderlaaten in Rotenburg 1942.

De Bedrief in Rotenburg is ok hüüt noch Stammsitt von`ne Landtechnikafdelen.

De Heelmakwarksteed to Anfang von`ne 60er Johrn
- vondaag steiht hier de Bruuktmaschinenhall

Johannes un Karl Plump, de Steefsöhns von C.W. Tiemann, de beide in den Beroopstwieg liehrnt un al vör`n Krieg in dat Ünnernehmen arbeit harrn, kömen 1945 ut`n Krieg torüch. Bit 1948 woor bloots wenig verköfft, aver veel heelmakt.

1971 is denn to denn Bedrief an`ne Verdener Straat dat hüütige Verwaltungsgebüüd tokamen; laater sünd denn noch een Neebo von de Warksteed un de Bruuktmaschinenhall tokamen.

Dat ne`e Verwaltungsgebüüd mit Ersatzdeelloger
is 1971 erricht worrn

In Johr 1981 övernöhm de drütte Generatschoon de Verantwoorden in Huus Tiemann. Dat wöörn de Söhns von Johannes Plump, Wolfgang un Dr. Dirk Plump, de af düssen Tietpunkt de Geschäftsleitung büllt hebbt.

Ünner jümehr Verantwoorden wüß dat Ünnernehmen avermaals: 1990 is in Bremervörde de hüütige Bedrief an Gewerbering 5 kumplett neeboet worrn. Von dorut ward de Landkreise Cuxhaven, Stade, Osterholz-Scharmbeck un natürlich de Ooltkreis Bremervörde afwohrt

Na de Wenn is de Fa. Tiemann sietens JOHN DEERE noch een Verkoopgebiet in Sachsen - Anhalt överdrogen worrn. Ok hier wöör eerstmaal Pionierarbeit fraagt. Na Beginn von de Geschäftstädigkeit op dat Gelänn von een LPG kunn 1993 dat Apenmaken von den neeboeten Bediref in Barnstädt bi Halle fiert warrn.

Na dat Utscheden von Wolfgang Plump in Johr 2002 leid Dr. Dirk Plump un Frank König gemeensam de Landmaschinenafdelen von Tiemann. Noch in sülvig Johr is in Sittensen direktemang an`ne Autobahn A1 dat Bruktmaschinenzentrum A1-TRAKTOR.DE A1-TRAKTOR.DE erricht worrn. In Johr 2004 kunn trutz na wie vör bannig starken Wettbewarv eerstmals de Marktföhrerschap bi de wichtigste Produktgrupp, de Treckers, övernahmen warrn.

Tosamen sünd bi de Firma Tiemann mit de beiden Standbeen LKW un Landtechnik hüüt över 360 Mitarbeider anstellt.